Vinirlər
Vinir dişin ön səthinə yapışdırılan nazik, fərdi hazırlanan lövhədir. Dişin rəngini, formasını, ölçüsünü və ya uzunluğunu dəyişərək gülüşün görünüşünü yaxşılaşdırır.
Hansı hallarda tətbiq olunur?
- Diş minasının dönməz rəng dəyişiklikləri
- Ön dişlərdə dişləmə təsir etməyən yüngül əyrilik və qeyri-bərabər forma
- Köhnə plombların və kiçik çatların yaratdığı estetik qüsurlar
- Dişlər arasında kiçik boşluqlar
Vinir növləri
Kompozit vinirlər
Birbaşa dişin üzərində kompozit materialdan formalaşdırılır. Daha sadə üsuldur, lakin qida və içkilərdəki rəngləyici maddələrdən təsirlənə bilir və vaxtaşırı korreksiya tələb edir.
Keramika (laminat) vinirlər
Laboratoriyada hər pasiyent üçün fərdi hazırlanır. Təbii dişin forması, rəngi və şəffaflığına maksimum yaxındır və zamanla rəngini dəyişmir.
Kimlərə tövsiyə olunmur?
- Ciddi dişləm pozğunluğu (malokluziya) olduqda
- Diş minası çox nazik olduqda
- Ön dişlərə həddindən artıq yük düşdükdə
- Müalicə olunmamış karies olduqda — əvvəlcə müalicə aparılmalıdır
Vinirlərin quraşdırılmasına qərar verməzdən əvvəl materialın seçimi dişlərə düşən yük və bərpa ehtiyacının dərəcəsi nəzərə alınaraq həkimlə müzakirə olunur.
Gülüşün kompleks bərpası
Bəzi hallarda estetik nəticə yalnız bir üsulla əldə olunmur. İtirilmiş dişlər implantlarla, görünən dişlər isə vinir və ya qapaqlarla bərpa edilərək gülüş həm estetik, həm də funksional baxımdan bütöv yenilənir.
Planlama zamanı aşağıdakılar nəzərə alınır:
- Gülüşün simmetriyası və üzün mərkəz xətti
- Mərkəzdən kənarlara doğru dişlərin ölçü nisbətləri
- Diş ətinin sağlamlığı və görünən hissəsi
- Düzgün dişləm və çeynəmə funksiyası
Diş əti gülüşü (gummy smile)
Gülərkən və ya danışarkən yuxarı diş ətinin 2–3 mm-dən çox görünməsi «gummy smile» — diş əti gülüşü adlanır. Bu, gülüşün harmoniyasını pozan və pasiyenti çox vaxt narahat edən estetik problemdir.
Korreksiya üsulu səbəbə görə seçilir. Diş əti və sümüyün ölçüləri alınır, sonra ya yalnız diş əti, ya da diş əti ilə birlikdə sümük cərrahi yolla korreksiya olunur. Bəzi hallarda üst dodağa da cərrahi müdaxilə tələb oluna bilər.
Estetik müalicə necə planlaşdırılır?
-
Konsultasiya
Şikayətlər və gözləntilər müzakirə olunur — hansı dəyişikliyi görmək istədiyinizi dəqiqləşdirmək vacibdir.
-
Müayinə
Dişlərin, diş ətinin və dişləmin vəziyyəti qiymətləndirilir, lazım olduqda rentgen müayinəsi aparılır.
-
Plan
Mümkün variantlar, mərhələlər və gözlənilən nəticə izah olunur.
-
İcra və nəzarət
Konstruksiyalar hazırlanır, uyğunluq və rəng yoxlanılır, sonra daimi bərkidilir.
Tez-tez verilən suallar
Vinir üçün dişlər yonulurmu?
Vinirlər üçün dişin ön səthindən adətən çox az miqdarda toxuma götürülür. Hazırlığın həcmi klinik vəziyyətə və vinirin növünə görə müəyyən edilir.
Vinirlər təbii görünürmü?
Keramika vinirlər dişin təbii forması, rəngi və şəffaflığına maksimum yaxın hazırlanır, buna görə təbii dişlərdən seçilmir.
Ön dişlər arasındakı boşluğu bağlamaq mümkündürmü?
Bəli. Diastema sağlamlıq üçün zərərli olmasa da, estetik narahatlıq yaradırsa, boşluğu daraltmaq və ya bağlamaq mümkündür. Uyğun üsul boşluğun səbəbinə görə seçilir. Diastema haqqında ətraflı.